ОФИЦИЈАЛНА ПРОЕКЦИЈА ЗА РАСТ НА БДП ЗА 2024 ГОДИНА 3,4%
РАСТ НА ИНВЕСТИЦИИТЕ И ПОТРОШУВАЧКАТА, ЗАКРЕПНУВАЊЕ НА
НАДВОРЕШНАТА ПОБАРУВАЧКА
Во 2024 година економскиот раст во земјата се очекува да забрза и да изнесува
3,4%.
Ова зголемување треба да се оствари во услови на зголемување на инвестициите,
раст на потрошувачката на солидно ниво и закрепнување на надворешната побарувачка.
Најголем придонес кон растот во 2024 година се очекува да имаат бруто-
инвестициите со раст од 8,4%, пред се како резултат на интензивирањето на реализацијата
на големите инфраструктурни проекти финансирани од државата (коридор 8 и 10),
придружени со мерките и активностите за поголема реализација на капиталните
инвестиции предвидени со Планот за забрзан економски раст.
Државната поддршка за унапредување на приватниот сектор и зајакнување на
конкурентноста, иновативноста и технолошкиот развој на претпријатијата ќе биде преку
обезбедување на алтернативни извори и инструменти за финансирање, како и најавените
инвестиции за проширување и изградба на нови капацитети во технолошко-индустриските
развојни зони кои се очекува да придонесат кон раст на приватните инвестиции.
Започнувањето на пристапниот процес кон ЕУ, ќе ги зајакне реформските процеси
во земјата ќе обезбеди зголемена поддршка за инвестции со што дополнително ќе се
унапреди довербата кај инвеститорите. Поволните услови во земјата како и зголемениот
интерес и поддршка за инвестиции во обновливи извори на енергија дополнително ќе ја
поддржи инвестициската активност.
